پێنج شەممە, 29 حوزەیران 2017

سزای لەبار بردنی كۆرپەلە 

هەڵسەنگاندنى بەکارهێنەر: 0 / 5

Star InactiveStar InactiveStar InactiveStar InactiveStar Inactive
 

 

ناز رزگار شیخانی

لەبار بردن بریتیە لە هەڵسانی دایك بە لەبار بردنی ئەو كۆرپەلەیەی كە لە سكی دایكدایە یاخود كەسێكیتر بەم كارە هەڵدەستێ‌ جا چ بە ڕەزامەندی دایك بێت یان بێ‌ ڕەزامەندی ئەو بێت. 

كاتێ‌ دایكێك سكپڕ دەبێت ئەوا ئەو كۆرپەلەیەی ناو سكی مافی ژیانی هەیە كەس بۆی نیە لە ناوی ببات  تەنانەت دایكەكەش مافی ئەوی نیە لە بار خۆی ببات. 

یاسای سزا دانی عیراقی لە 3 ماددە باسی لەبار بردن دەكات

لە ماددە 417 لە برگەی یەكەمدا هاتووە ( هەر دایكێك هەستا بە لە باربردنی كۆرپەلەكەی جا بە هەر ئامازێك بێ‌، یاخود كەسێكیتر بەڕەزامەندی دایك بەم كارە هەڵسا ئەوا سزا دەدرێت  كە لە ساڵێك زیاتر نەبێ‌ هەروەها غەرامە دەكرێت كە لە (225000) دینار زیاتر نەبێ‌. یاخود بە یەكێك لەم دوو سزایە سزا دەدرێ‌)

بەڵام لە روی واقیعی دادوەر سزای ماددیەكە هەڵدەبژێرێ‌ بۆ دایكەكە.

لەبڕگە دووەمدا هاتووە دەڵێت ئەگەر هاتوو هەركەسێك بە ڕەزامەندی دایكەكە هەستێت بە كاری لە بار بردنی كۆرپەلە ئەگەر ئەو ئامێرەی كە بە كاری دەهێنێ‌ بووە هۆی مردنی دایكەكە ئەوا تاوانبارەكە سزا دەدرێت بە بەند كردن كە لە(7) ساڵ زیاتر نەبێ‌.  

لە بڕگەی سێیەمدا سزاكە توند دەكات بۆ هەر كەسێك كە پیشەكەی پزیشك یان دەرمانساز یان كیمیاگەر یان مامان بێت واتا سزاكەی تووندتر دەكات چونكە ئەو كەسەی ئەو كارە دەكات تەنها بۆ دەستكەوتی ماددی كۆتایی بە ژیانی كۆرپەلە دەهێنێت. بۆیە لە دەسەڵاتی دادوەرە كە سزاكە توند بكات.

وە هەروەها لە بڕگەی چوارەمی ماددەكەدا هاتووە كە سزاكە سوكتر دەكات بۆ ئەو ئافرەتەی كە بەڕێگەی ناشەرعی سكی پڕ بووە لەبەر پاراستنی ئابروی خۆی ئەم كارەی ئەنجام داوە ، واتا سزا دەدرێت بەڵام دادوەر سزاكەی كەمێك سوكتر دەكات چونكە مەبەستی كوشتن نیە بەڵكو مەبەستی پاراستنی ئابڕوی خۆیەتی.

 

لە ماددە 419 باس لەوە دەكات كاتێ‌ كەسێك بە بێ‌ ڕەزامەندی دایكەكە هەڵدەستێت بە لە بار بردنی كۆرپەلەی ناو سكی دایكەكە. لێرەدا سزاكە توندە چونكە بەزۆر یاخود بێ‌ ئاگاداری دایكەكە كارێك دەكات كە مەبەستی لەو كارە لە بار چوونی كۆرپەلەكەیە. بۆیە ئەو تاوانبارە بە بەند كردن سزا دەدرێت كە لە دە ساڵ زیاتر نەبێ‌. 

لە برگەی ددوەمدا هاتووە دەڵێت ئەگەر كەسێك بە بێ‌ ڕەزامەندی دایكەكە ویستی كۆرپەلەكەی  لە بار ببات بەڵام لە ئەنجامدا دایكەكە مرد ئەوا سزا دەدرێت بە بەند كردن كە لە 15 ساڵ زیاتر نەبێت.

لە بڕگەی سێیەمدا بە هەمان سێوە ئەگەر پزیشك یان مامان بوو ئەگەر بەبێ‌ ڕەزامەندی ئافرەتەكە هەستا بە لە بار بردنی كۆرپەلەكەی ئەوا دادگا فەرمان دەدات بە وەی كە بە ماوەی 3 ساڵ پیشەكەی ڕادەگرێت. واتا دادگا رێ‌ گری دەكات لە لە بەردەوام بوونی پیشەكەی بۆ ماوەی  3 ساڵ.

بە ڕای من لێرەدا ئەم بڕگەیە هەڵەی تیایە دەبووایە سزاكە توندتر بكات.

لەماددە 419 هاتووە ئەگەر كەسێك دەست درێژی كردە سەر ئافرەتێكی سكپر بە مەستی لێدان و بریندار كردنی كە زانیبی سكپرە یاخود نەیزانیبێ‌ ، ئەوا لەم حالەتەدا سزاكەی توندتر دەكرێت ئەمەش لە دەسەڵاتی دادوەرە.

 

ئەگەر سەیری ئاینی ئیسلامی پیرۆزیش بكەین بە هەمان شێوە لە بار بردنی كۆرپەلە حەرام كراووە پێغەمبەر (د.خ) لە فەرمودەیەكدا دەفەرموێ‌ ((هەر كەسێ‌ كۆرپەكەی لە بار ببات ئەوا دەبێ‌ حەقی خوێنی ئەو كۆرپەیە بدات))

هەروەها د.احمد بالیسانی كە دكتۆرای هەیە لە شەریعەتی ئیسلامی بە بۆچونی ئەو لە بار بردنی كۆرپەلە حەرامە جا لە هەر قۆناغێك بیت.

 بەڵام بەپێی هەندێ‌ بۆچونی شارەزایانی بواری ئاینی دەڵێن تەنها لە حالەتێكدا حەرام نیە ئەویش ئەگەر هاتوو بە هۆی كۆرپەلەكە ژیانی دایكەكە لە مەترسیدا بوو  ئەوا لەم حالەتە لە بار بردنی نابێتە حەرام.

 

 

 

یه‌كێتیی ئافره‌تای كوردستان

Email:

به‌ڕێوبه‌ره‌ی ماڵپه‌ڕ

نه‌سرین حه‌سه‌ن