سێ شەممە, 26 ئەیلول 2017

سەربەخۆیی دەمانپارێزێت

راژان
سەربەخۆیی مافی ڕەوای هەر گەل و نەتەوەیەكە. هەر یەك لەوانە بۆ مانەوەیان و پاراستنیان پێویستە سەربەخۆ بن، واتە دەوڵەت پارێزەریان دەبێت. گەلی كوردستان بەدرێژایی مێژوو خەباتی بۆ سەربەخۆ بوونی كردووە. ئەو دەوڵەتانەی كە كوردستانی بە زۆر پێوە لكێنراوە هەمیشە زوڵم و زۆرداریان لە چوارچێوەی دەوڵەتەكەیان بەرامبەر خەڵكی كوردستان كردووە. باشووری كوردستانیش لەوەتای بە عێراقی دەستكردە لكێنراوە بە درێژایی مێژوو تا ئێستاش بەردەوام تاوانی جۆراو و جۆر لەلایەن عێراقەوە بەرامبەر ئەنجام دراوە. چونكە ئەم دەوڵەتە لەسەر ئەساسی تائفی و مەزهەبی دامەزراوە نەیانتوانیوە خاوەندارێتی پێكهاتەكانی بكات هەر پێكهاتەیەك هاتبێتە سەر حوكم هەوڵی چەوساندنەوە و لەناوبردنی پێكهاتەكانی تری داوە هەمیشە كورد زەرەرمەندی یەكەم بووە چونكە كەمینە بووە لە عیراق بۆیە لە دوای ڕووخانی ڕژێمی بەعس سالی ٢٠٠٣ كورد كە بەرپرسیاریەتیشی وەرگرت لە بەغدا نەیتوانی بەپێی پێویست مومارەسەی دەسەڵاتی خۆی بكات وە لە دەستووری عێراق دان بە مافەكانی نراوە بەڵام جێ بەجێ نەكراوە هەمیشە ئاستەنگی بۆ دروست دەكرا ئەمەش لە ئەنجامی ئەو عەقڵیەتە شۆڤێنیەیە كە لە عێراق بوونی هەیە و بەردەوامە. بەمەش عێراق هێچ كات ئارامی بەخۆیەوە نابینێت و جێی متمانە نابێت بۆ پاراستنی كوردستان و هەموو كاتێك ئەگەری ئەوە هەیە لە كاتی بەهێزبوونی حكومەتی عێراق تاوانەكانی ئەنفال و كیمیاباران و بەعەرەب كردن و راگواستن و كاولكاری بەرامبەر بە كورد دووبارە بكاتەوە و جیهانیش بێ دەنگی هەڵدەبژێرێت وەكو پێشتر چونكە ئێمە سەربەخۆ نین وەكو بەشێك لە دەوڵەتی عێراق مامەڵەمان لەگەڵ دەكرێت. كاتێك سەدام حسێن كوەیتی داگیر كرد جیهانی لەسەر هاتە وەڵام و بەرگریان لێكرد،بۆ؟ چونكە كوەیت دەوڵەت بوو. كەواتە بۆ پاراستمان و ڕزگار بوونمان لە وڵاتێك كە هەمیشە سەرچاوەی مەترسی بووە بۆمان و وڵاتێك كە چەندین ساڵە لەسەر یەك لە ریزی مەترسیدارترین پێنج دەوڵەتی جیهانە بۆ ئەمساڵیش ٢٠١٧لە ڕیزبەندی سێیەم مەترسیدارترین دەوڵەتی جیهانە, پێویستە سەربەخۆ بین و لەرۆژی ٢٥ ی ئەیلول بە بەڵێ دەنگ بە سەربەخۆیی دەدەین و دژی زوڵم و زۆری سەدان ساڵە دەوەستینەوە و ڕۆحی شەهیدانمان ئاسوودە دەكەین. مێژوویەكی نوێ لە تۆماری بزاڤی ڕزگاریخوازی كوردستاندا دەنوسرێتەوە. دەبینە نموونەیەكی باڵا لە دیموكراتخوازی لە ناوچەیەك كە لێوانلێوە لە دكتاتۆریەت و شەڕخوازی.

ئەو بابەتە لە ژمارە 4 بلاوكراوەی بەڵی تایبەت بە یەكێتی ئافرەتانی كوردستان بڵاوكراوەتەوە 

یه‌كێتیی ئافره‌تای كوردستان

Email:

به‌ڕێوبه‌ره‌ی ماڵپه‌ڕ

نه‌سرین حه‌سه‌ن