یەک شەممە, 24 ئەیلول 2017

لە هەگبەی ئافرەتێك

لە هەگبەی ئافرەتێك
نەسرین حەسەن
كەش و هەوای گەرمی ناو پاس هیچی كەمتر نەبوو لە هی دەرەوە، تەنیا جیاوازی ئەوە بوو كە لە تیشكی هەتاوەكە دەیپاراستی. نەمزانی چۆن دانیشتم ، تەنیا ئەوەندەم زانی كە ئەوەی لە تەنیشتی دانیشتووم ئافرەتێكە ، زۆر بە بێزاری گوتم: "ئای چەند گەرمایە ، خەریكە دەسووتێم"، بەڵام پێدەچوو ئەو بەو گەرمایە بێزار نەبێت ، زەردەخەنەیەكی جوانی لێدا و گوتی:" خەڵكی ئێستا نە بەرگەی سەرما دەگرن ، نە گەرما!" منیش پێكەنیم و گوتم: "نا وانییە، بەس بەراستی ئەمساڵ زۆر گەرمایە" ، سەیرێكی كردم و منیش لە چاوەكانی ڕامام، چاوەكانی پڕبوون لە قسە ، كە پێدەچوو حەز بكات باسیان بكات و یەكێك گوێی بۆ بگرێت ، دواتر هەر لە بەر خۆیەوە دەستی كرد بە قسەكردن و گوتی: "كچێ‌ خۆ لە گەرمای بن پەرەمێز و غاز گەرمتر نییە، كاتێك دەتەوێت نان بكەی. بەو گەرمایە هەموو رۆژێك ئیش دەكەم و نان بۆ خەڵك دەكەم و ناچارم بژێوی ژیانی خۆم و منداڵەكانم دابین بكەم، جاری وایە ئەوەندە ماندووم شەو تا بەیانی لە بەر ئازاری جەستەم خەوم لێناكەوێت، بەڵام لەگەڵ ئەوەشدا هەموو رۆژێك دوعا دەكەم خوا هێزم پێ‌ ببەخشێت بۆ ئەوەی بتوانم منداڵەكانم پێ‌ بگەیەنم ، خۆشترین رۆژی ژیانم ئەو رۆژەیە كە هەویرەكەم نانی جوانی لێ‌ دێت و كڕیارەكانم رازی دەبن. ئەوەش بۆ من هەموو شتێكە كاتێك دەبینم منداڵەكانم دڵخۆشن ، چونكە باوكیان لە پێناو كوردستاندا گیانی بەخت كرد، منداڵەكانیشم ئەو دیارییە جوانەن كە بۆ خزمەتكردن بۆ كوردستانێكی ئازادو سەربەخۆ پێیان دەگەیەنم و ئاواتی هاوسەرەكەم دێنمەدی...." چاوم پڕ بوو لە ئاو و خۆم پێ‌ نەگیرا و توند لە ئامێزم كرد. لە پاسەكە دابەزیم و رێی ماڵەوەم گرتە بەر، حەزم دەكرد ئەو شانازییەم پێ‌ ببەخشرێت كە قسەی زیاتری لەگەڵدا بكەم و پێی بڵێم :" شانازیت پێوە دەكەم شێرە ژنی كوردستان كە چەند لە خۆبوردوانە و خۆراگرانە و بەو هەڵویستە پیرۆزەت خەبات لە پێناو سەربەخۆیی كوردستان دەكەی، حەزم دەكرد پێی بڵێم: " دەنگی "بەڵێ‌ "ی تۆ لە ریفراندۆم ، دەنگی هەزاران شەهیدی كوردستانە كە وەكو هاوسەرەكەت لە پێناو ئازادی كوردستان گیانیان بەخشیوە. نەمزانی چۆن ئەو رێگەیەم بڕی و گەیشتمە ماڵەوە، بەڵام ئەوەی بەلامەوە سەیر بوو هەستم بە گەرما نەدەكرد، لەوانەیە لە بەر ئەوە بووبێت كە دڵنیابووم لەوەی گڕوتینی ریفراندۆم و

دەنگدان بە "بەڵێ‌" ئەوەندە زۆر و بەرزە كە هەست بە هیچ گەرمییەكی تر ناكەی.

ئەم وتارە لە ژمارە 4 بلاوكراوەی "بەڵێ‌" كە تایبەتە بە یەكێتی ئافرەتانی كوردستان بڵاوكراوەتەوە 

یه‌كێتیی ئافره‌تای كوردستان

Email:

به‌ڕێوبه‌ره‌ی ماڵپه‌ڕ

نه‌سرین حه‌سه‌ن