پێنج شەممە, 17 ئاب 2017

یەكێتی ئافرەتانی كوردستان بە بۆنەی دەستنیشانكردنی رۆژی ئەنجامدانی پرۆسەی ریفراندۆم بەیاننامەیەكی بڵاوكردەوە

یەكێتی ئافرەتانی كوردستان بە بۆنەی دەستنیشانكردنی رۆژی ئەنجامدانی پرۆسەی ریفراندۆم بەیاننامەیەكی بڵاوكردەوە ئەمەش دەقەكەیەتی:

کوردستانیانی سەربەرز
ئافرەتانی کوردستان
دایکانی شەهیدانی رێگای ئازادیخوازی کوردستان
سەرکردایەتی سیاسی کوردستان بە سەرۆکایەتی سەرۆک بارزانی و پشتیوانی لایەن و پێکهاتەکانی کوردستان بە بریارێکی مێژوویی ڕێکەوتی ٢٥/٩ یان دەستنیشان کرد بۆ ئەنجام دانی پرۆسەی ریفراندۆم بۆ بڕیاردان لە چارەنوسی گەلی کوردستان ، بڕیارێک، کە بەرهەمی خەباتی نەوە یەک لە دوای یەکەکانی ئەم نیشتیمانە سەربەرزەیە بڕیارێک، کە کۆتایی بە ژێردەستەیی دەهێنێت و بناغەی دامەزراندنی دەوڵەتێکی سەربەخۆیە ئەو بڕیارەی، کە نەیارانی کوردستان هەموو هەوڵێکیان دا بۆ ئەوەی سازشی لەسەر بکەین ، بەڵام نەیانتوانی لە ٢٥/٩ بە کۆدەنگی نیشتیمانی و یەکریزی سیاسی وەڵامیان دەدەینەوە .
ئافرەتانی ماندونەناس
ریفراندۆم بۆ سەربەخۆیی رێگایەکە بۆ بریاردان لە چارەنوسی خۆمان و داڕشتنی داهاتوی وڵاتێک کە لەسەر بنەماکانی مافی مرۆڤ و سەروەری یاسا و نەمانی جیاوازی رەگەزی و دادپەروەری کۆمەڵایەتی بونیاد نرابێت، کاتی ئەوە هاتووە جێدەستی خۆمان لە داڕشتنی وڵاتەکەمان دیار بکەین و وڵاتێک بونیاد بنێین کە خاوەن کۆمەڵگەیەکی مەدەنی بێ و جیاوازی ڕەگەزی لەگۆر بنێت، ئێمە دڵنیاین کە برینی ئافرەتانی کوردستان لە سایەی بێ دەوڵەتی و ژێردەستەیی و ستەمی داگیرکەران لە برینی هەموان قوڵترە بە ڕادەیەک کە هیچ برینێك لە برینی دایک و هاوژینی شەهیدان قوڵتر نییە و هیچ کارەساتێک لە لە کارەساتی کچانی شنگال بە ئازارتر نییەو هیچ تاوانێک لە تاوانی ئەنفال گەورەتر نییەو کە ئافرەتان پشکی سەرەکی قوربانیدانیان بەرکەوت تێیداو تەنها سەربەخۆیی ساڕێژی ئەم برینە دەکات و ئایندەمان مسۆگەر و رەوانی شەهیدانمان شاد دەکات .
ئێمە لە یەکێتی ئافرەتانی کوردستان بە دڵگەرمی و بە پەرۆشەوە پێشوازی لەم بڕیارە مێژووییە دەکەین و بە هەموو توانایەکمان پشتیوان و هاوکارین بۆ سەرخستنی ئەم پرۆسە چارەنوسسازە و داوا لە سەرجەم ئافرەتانی کوردستان دەکەین لەم ڕۆژە مێژوییەدا دەنگی خۆیان بە بەڵێ بدەن بۆ سەرکەوتنی پرۆسەی ریفراندۆم و بڕیاردان بۆ جیابونەوە لە عێراقی پڕ کێشە و ئاڵۆزی و ناتۆلێرانس، ئیرادەی ئێمە گرنگتری فاکتەرە بۆ سەرکەوتنی ریفراندۆم لە ٢٥/٩ ئەو ئیرادەیە بە جیهان ڕادەگەیەنین و دەیسەلمێنین کە ئافرەت پێشەنگی ئەم خەباتە مەدەنیەن، ٢٥/٩ بەڵێ بۆ سەربەخۆیی دەکەینە ناونیشانی هاتنە دنیای ئەو کیانەی کە هەموو ژان و ئازارەکانی لە دایکبونی بینی ، ٢٥ ی ئەیلول دەبێتە بناغەی ئەو دەوڵەتەی کە دەبێتە رووگەی شارستانی و نیشتیمان و لانکی پێکەوە ژیانی جۆراوجۆریەکان.
سوپاس بۆ سەرۆک و رێبەر و رێنیشاندەرمان بۆ سەرفرازی هێژا سەرۆک بارزانی.
سوپاس بۆ پێشمەرگە پارێزەرانی بەها مرۆڤایەتیەکان .سوپاس و ستایش بۆ دایکانی شەهیدان .
سەروەری بۆ شەهیدان .
یەکێتی ئافرەتانی کوردستان
مەکتەبی سکرتاریەت ٨/٦/٢٠١٧

یه‌كێتیی ئافره‌تای كوردستان

Email:

به‌ڕێوبه‌ره‌ی ماڵپه‌ڕ

نه‌سرین حه‌سه‌ن