شەممە, 19 ئاب 2017

پەیامی یەکێتی ئافرەتانی کوردستان بۆ سەرجەم ئافرەتانی کوردستان

ئافرەتانی سەربەرزی کوردستان

گەلی کوردستان  لە رێکەوتی(٢٥/٩/٢٠١٧) بۆ بەجێگەیاندنی مافێکی گەردونی و یاسایی و سروشتی خۆی، لە وێستگەیەکی مێژویی چارەنوسسازو لە پرۆسەیەکی دیموکراسی و شارستانیدا، کە پرۆسەی ریفراندۆمە بڕیاری خۆی سەبارەت بە دیاریکردنی چارەنوس و جیابونەوە لە عێراقی عەرەبی، بە جیهان ڕادەگەیەنێت.

ریفراندۆم بۆ سەربەخۆیی پرۆسەیەک نییە، پەیوەست بێ بە هیچ حیزب و لایەنێکەوە، بەڵکو پرسێکی نیشتیمانیەو داهاتوی کوردستان لە چوارچێوەی دەوڵەتێکی سەربەخۆدا مسۆگەر دەکات، هەربۆیە بەرپرسیاریەتیەکی مێژوویی لە ئەستۆی سەرجەم ئێمەی کوردستانیانە، کە پێکەوە بەیەک دەنگ کوردستان بگەیەنن بە کەناری ئارام و هەواری دڵنیایی.

ئێمەی ئافرەتانی کوردستان لەم پرسە چارەنوسسازەدا ئەرکێکی قورس لە ئەستۆمانەو پێویستە هەمومان یەک هەڵوێست بین و بیسەلمێنین، كەوا ئافرەت وەک تاکێکی سەربەخۆو هاونیشتیمانیەکی ئەرکدارو خاوەن ماف، وەکچۆن جێدەستی لە هەموو پرۆسەیەکی ژیانی کۆمەڵدا دیارە، لە دیاریکردنی ئاراستەی چارەنوسی وڵات و پرۆژەی دامەزراندنی دەوڵەتیش پێویستە ئەم ڕۆڵە زیاتر بەرجەستە بکات.

ئافرەت لە سەرجەم شۆڕشەکانی گەلەکەماندا زۆرترین ناسنامەی قوربانیدانی بەرکەوتوە، راستەوخۆ قوربانی پرۆسەکانی ئەنفال و کیمیا باران و زۆرلێکراو و چەوساوە بووە، لە یەک کاتدا دایکی شەهید و خێزانی شەهید، ئاوارە و دور لە نیشتیمان و، بەردەوام ئازاری بێ دەوڵەتی چەشتووە.

سەرباری ستەمی سیاسی، داگیرکەر هەوڵی داوە كلتوری دواكەوتوی ناوچەكانی دیكەی عێراق تێكەڵ بە كلتوری كوردستان بكات، لە ئەنجامی پەیرەو کردنی ئەم سیاسەتەش ئافرەتانی کوردستان زۆرترین قوربانیان بۆ بەدەستهێنانی مافە مرۆڤایەتیەکانیان داوە، تا ئێستاش باجی ئەم سیاسەتە دەدەین .

بۆ کۆتایی هێنانی یەکجاری بەم قوربانیدانەو، وەرچەرخان لە ڕەوشی کۆمەڵگەکەمان و پرسی ئافرەت بە تایبەتی، تاکە چارەسەر جیابونەوەیە لە عێراق و راگەیاندنی دەوڵەتی سەربەخۆی کوردستان، دەوڵەتێک، کە هاوسەنگ بێ بۆ هەموو گروپە ئاینی و ئیتنیکیەکانی، دووربێ لە هزری توندڕەوی و جیاوازی جێندەری .

بانگەشە بۆ کۆمەڵگەی مەدەنی و چاکسازی لە یاسای باری کەسی و بەجێگەیاندنی بزوتنەوەی یەکسانیخوازی ئافرەت لە چوارچێوەی وڵاتێکی پڕ ئاژاوەو ناکۆکی و چەند بەرەکیدا مەحاڵە، لە کاتێکدا سەرجەمی ناکۆکیەکان لەسەر بابەتی مەزهەبین و دوورو نزیک پەیوەندیان بە سەروەری مرۆڤەوە نییە، بۆیە هیچ ئاسۆیەکی گەش لە چوارچێوەی عێراقی عەرەبیدا بۆ ئێمەی کوردستانی بەدی نایەت.

هەر هەنگاوێک بەرەو چاکسازی و بەرەوپێشچون لە کایەی ئیداری و ئابوری و کۆمەڵایەتی و کۆی گشتی سیستەم لە کوردستان، لە چوارچێوەی دەوڵەتێکی سەربەخۆدا زامنترە لەوەی سەر بە دەوڵەتێک بین، كە تژیە لە هزری پیاوسالاری و كلتوری خێڵەكی و  ڕوانگەی مەزهەبی و بەتاڵە لە ئەگەرەكانی پێشكەوتن.

لە سۆنگەی بروا بونمان بەوەی کوردستان پێویستی بە ئێمەی ئافرەتەو، ئێمەش بە کوردستان، سەرچاوەی سەرەکی پەروەردە ئێمەین و گەورەترین کاریگەری کۆمەڵایەتیمان هەیەو دەتوانین وەرچەرخان دروست بکەین، هەروەها بڕوابونمان بەوەی تەنیا رێگای سەرفرازی ئێمە وەک ئافرەت هەروەها کۆمەڵگە سەربەخۆیی و دامەزراندنی دەوڵەتی سەربەخۆیە، بۆ ئەو ئامانجە مەزنە با یەکدەنگ و یەکهەڵوێست بین.

ئێمە لە کاتێکدا ستایشی هەڵوێستی ئافرەتانی کوردستان دەکەین، کە لە سەرجەم قۆناغەکاندا رۆڵی شایستەیان گێراوە، وەک پێشمەرگەو شۆڕشگێڕو بەرگریکار لە خاکی کوردستان، وەک کارەکتەری داهێنەرو بەرهەمدار لە  بەرێوەبردنی کۆمەڵگە، وەک میدیاکار و خاوەن بیرو تێکۆشەری ڕێگای یەکسانی، وەک دایکی میهرەبان وهاوژینی رەنجکێش و پەروەردەکاری سەرکەوتوو، ئازیزانمان، داواتان لێدەکەین، لەم پرۆسە چارەنوسسازەدا بەڵێ بۆ سەربەخۆیی کوردستان بکەن.

ئیمەی ئافرەت، کە بە ئەقل و ووردبینی و ڕامان، بە میهرەبانی و خەمخۆری بۆ بونیاد نانی ژیانێكی ئاسودە، بە ئازایەتی و خۆراگری، هاوبەش بووین لە هەموو قوربانیدانەکانی کوردستان و نەخشاندنی ڕێڕەوی کۆمەڵگە .

 بۆ رێزلینان لە قوربانیەکانی خۆمان وەک ئافرەت، بۆ ئارامی گیانی شەهیدانی ڕێگای ڕزگاریخوازی كوردستان، بۆ كوردستانێكی سەقامگیرو پێشكەوتوو، بۆ پێكەوە ژیانێكی تەباو ئاشتیانە، بۆ هاتنە كایەی دەوڵەتێکی یەكسان لە دەرفەت و دەسكەوت بۆ ئافرەت و پیاو، با لە ریفراندۆمدا هەمومان بەڵێ بۆ سەربەخۆیی کوردستان بکەین.

د.ڤیان سلیمان

سكرتیری یه‌كیتی ئافره‌تانی كوردستان

 

یه‌كێتیی ئافره‌تای كوردستان

Email:

به‌ڕێوبه‌ره‌ی ماڵپه‌ڕ

نه‌سرین حه‌سه‌ن