یەک شەممە, 24 ئەیلول 2017

ژنێن كوردێن ئێزدی پشتەڤانێن ئەنجام دانا ریفراندۆما هەرێما كوردستانێ‌ نە

ژنا كورد ب گشتی د درێژاهیا د مێژوویێ‌ دا ل هەموو شۆرەش و سەرهلدانا دا خەبات كریە و مل بملێ‌ برایێن خۆ یێن پێشمەرگە خزمەتا مللەتێ‌ خۆ كریە،هەتا نهۆ چاڤەرێ‌ رۆژەكا وەسا یا نەتەوەی و پیرۆز یا سەربەخۆبوونا كوردستانێ‌ بوویە،لەوا چالاكڤان و رۆژنامەڤانێن كچ و ژنێن كوردێن ئێزدی پشتەڤانیا خۆ بۆ ئەنجام دانا ریفراندۆما هەرێمێ‌ دووپات دكن كو پێتڤیە ب دەنگێ‌ بەلێ‌ بچینە سەر سندۆقێن دەنگدانێ‌ ماف و چارەنڤیسێ‌ خۆ دیار بكەین.
راپۆرت:دلڤین رەشید
چالاكڤانا كوردا ئێزدی(رەوشەن دەخیل)دیاركر،ریفراندۆم پرسەك گرنگ و چارەنڤیسسازە و رۆژەكا پیرۆز و دیرۆك و نەتەوی یە بۆ مللەتێ‌ كورد،لەوما دڤێت ئەم گرنگیەكا ئێكجار زۆر بڤێ‌ رۆژێ‌ بدەین ئەوژی بتنێ‌ ب دەنگێ‌ بەلێ‌ بچینە سەرسندۆقێن دەنگدانێ‌ ماف و چارەنڤیسێ‌ خۆ دیاربكەین ،چنكو ئەڤە تاكە رێیە ژبۆ چارەسەركرنا ئاریشان و خۆشكرنا ژین و ژیانا خەلكێ‌،لێ‌ دڤێ‌ پرسێ‌ دا دڤێت ژنێ‌ رۆلەكێ‌ كاریگەر هەبت،چنكو د مێژوویێ‌ دا ژنا كورد ل هەموو شۆرەش و سەرهلدانا دا خەبات كریە و مل بملێ‌ برایێن خۆ یێن پێشمەرگە خزمەتا مللەتێ‌ خۆ كریە وچاڤەرێ‌ رۆژەكا وەسا یا نەتەوەی و پیرۆز بووینە، ئەوژی رۆژاسەربەخۆبوونا كوردستانێ‌ یە،ژبەركو ئەڤە رێیەكە بۆ بریاردان و چارەنڤیسێ‌ مە ژبۆ نەمانا جێوازیا رەگەزی و نەدادپەروەریێ‌،ب هیڤینە ب سەربەخۆبوونا كوردستانێ‌ دێ‌ برینا ژنێن بووینە قوربانی و كەفتینە بن دەستهەلاتا داگیركەران دا دێ‌ ب داوی ئێت،چنكو برین ژ برینا دەیك و خێزانێ‌ جانگۆریا مەزنتر نینە و چ كارەسات ژ كارەساتا شنگالێ‌ ب ئێش و ئازارتر نینە و چ تاوان ژ تاوانا ئەنفالێ‌ مەزنتر نینە و ژن پشكا سەرەكی یا قوربانیانە،لەوا ب سەربەخۆیێ‌ چارەسەریا ڤان برینا دێ‌ ئێتە كرن و ئایندێ‌ وان وێ‌ بێتە مسۆگەركرن،لەوا دبێژم بەلێ‌ بۆ سەربەخۆبوونا كوردستانێ‌.
رۆژنامەڤان(ناڤین سموقی)گۆت:ریفراندۆم و سەربەخۆیا كوردستانێ‌ هەكە بۆ مللەت گرنگیەكا تایبەت هەبت، بۆ ژنا كورد گرنگیەكا ئێكجار زۆر هەیە،چنكو ژنا كورد ب گشتی و یا ئێزدی ب تایبەتی هەردەم بوویە قوربانیا شەران بەلگا هەرەمەزن ژی كارەساتا شنگالێ‌ بوویە دەمێ‌ كچ و ژنێن كوردێن ئێزدی ژلایێ‌ تیرۆرستێن داعشڤە هاتنە گرتن و ل بازاران هاتنە فرۆتن و كریارێن هۆڤانە دگەل وان هاتنە ئەنجام دان دچەرخێ‌ بیست و ئێكێ‌ دا ژلایێ‌ توندرەوترین دووژمنێ‌ جیهانێ‌ ڤە ئەو ژی داعش بوویە ،لەوما دبینم سەربەخۆبوونا هەرێما كوردستانێ‌ تاكە چارەیە بۆ رێیەكا دیموكراسی و رێزگرتن ل مافێ‌ مرۆڤا و ب تایبەت ژی ژبۆ ژنێ‌ دڤێت ژن ببتە ئەگەرێ‌ سەرەكی كو فشارێ‌ بێختە سەر هەموو لایەنان بۆ ئەنجام دانا پرسا ریفراندۆمێ‌،داكو هەركەسەك دوەلاتێ‌ پێكڤەژیانێ‌ دا ئەو ژی وەلاتێ‌ كوردستانێ‌ یە چارەنڤیسێ‌ خۆ دەست نیشان بكت و بگەهتە هەموو مافێ‌ خۆ یێ‌ رەوا ب شێوەیەكێ‌ یەكسانی بێ‌ جێوازی،هیڤیخوازم هەموو ب هەڤرا كاربكن ژبۆ سەرئێخستنا پرسا ریفراندۆمێ‌ و ل رۆژا دەنگدانێ‌ لسەر سندۆقان ئامادەببن،چنكو دەنگێ‌ مە چارەنڤیسێ‌ مەیە.
هەروەسا چالاكڤان(ڤیان ئەكرەم)رۆنكر،بابەتێ‌ ریفراندۆمێ‌ یێ‌ گرنگە دڤێت ئەم هەموو ب هەڤرا لسەر ڤی بابەتی كاربكن ژبۆ وێ‌ یەكێ‌ كوردستان سەربەخۆببت،ژبەركو هەر تاكێ‌ كورد وێ‌ بگەهتە مافێ‌ خۆ و تایبەت ژی كێم نەتەوەیێَن كوردستانێ‌ و كوردستان لاندكا پێكڤەژیانێ‌ یە هەموو پێكهاتە و ئایین لسەر ئاخا پیرۆزا كوردستانێ‌ دژین بێی جێوازی هەر كەسێ‌ دناڤا هەرێمێ‌ دا بژیت دێ‌ مافێ‌ خۆ هەبت،لگۆر ژمارا ئاكنجیێن خۆ هەكە هات و كوردستانێ‌ سەربەخۆییا خۆ وەرگرت دێ‌ مللەتێ‌ كورد گەهتە مافێ‌ خۆ ب تایبەت ژی كوردێن ئێزدی،وەكو كێم نەتەوە،دمێژوویێ‌ دا مللەتێ‌ ئێزدی گەلەك فەرمان و كارەسات دیتینە دناڤا وان دا قوربانیا ئێكێ‌ ژنا كوردا ئێزدی بوویە،دخوازم پشتی سەربەخۆبوونا كوردستانێ‌ گرنگی ب ژنا كوردا ئێزدی بێتە دان و ب تایبەت ژی كو جیێ‌ وێ‌ دناڤا دام و دەزگەهێن حكومی و حزبی داهەبن و پۆستێ‌ باش پێ‌ بێنە پەخشین ئەو بخۆ بریارێ‌ لسەر چارەنڤیسێ‌ خۆ بدەت،چنكو ئەڤە ژمێژە ئەم چاڤەرێ‌ رۆژەكا وەسا یا دیرۆكی بوون و ئەم بخۆ ببنە خودان بریار،ژبەركو ریفراندۆم مافێ‌ هەر وەلاتەكی یە،لەوما ئیرۆ رۆژ ئەم وەك گەلێ‌ كورد ئەم خوازیارن مە سەربەخۆیا خۆ هەبت و داخوازا سەربەخۆبوونێ‌ بكن،چنكو ب هیڤینە دێ‌ مللەتێ‌ كورد ب گشتی و ئێزدی ب تایبەتی پشتی سەرگرتنا پرسا ریفراندۆمێ‌ دێ‌ پاشەرۆژەكا باشتر و گەشتر هەبت.
ژبال خۆڤە رۆژناماڤان(خێرهات بێدەرڤان)دبێژت:سەربەخۆبوونا هەرێمێ‌ دەلیڤەكا زێرینە كو كوردستان بێتە ڤەقەتاندن ژعێراقێ‌،ژبەركو هەر دەمێ‌ نەخۆشی بسەرێ‌ مللەتێ‌ مە بێت بتنێ‌ كورد خۆ ل ئێك دكەنە خودان و كارەساتا شنگالێ‌ ژی بەلگا هەرە مەزنە،كو ئیرۆ ئەم هەموو ب چاڤێ‌ خۆ دبینن دڤێ‌ كارەساتێ‌ دا قوربانیا ئێكێ‌ تێدا ژنا كوردا ئێزدی بوویە،لەوما دقۆناغا نهۆ دا دڤێت ئەم هەموو پێكڤە ب تایبەتی ژی ژن ریفراندۆمێ‌ ب دەلیڤەكا زێرین ببینن و ڤێ‌ دەلیڤێ‌ ژ دەست نەدەن و هەموو شیانێ‌ خۆ بێخنە دكاری دا،ژبۆ سەر ئێخستنا سەربەخۆبوونا هەرێما كوردستانێ‌،چنكو ب سەرئێخستنا ڤێ‌ پرسێ‌ باوەرم وێ‌ داوی ب فەرمان و كارەساتێن بسەرێ‌ كوردێن ئێزدی هاتی بێت ب تایبەت ژی كو ئێدی ژنا ئێزدی نەبتە قوربانیا فەرمانا، ب سەربەخۆبوونا كوردستانێ‌ ئەم دێ‌ ببنە خودان بریار و ببنە رێگر د هەمبەر داگیركەرێ‌ مللەتێ‌ كورد ،داكو مێژویێن رەش ئێدی دوبارە نەبنەڤە و كچێن مە ل بازاران نەئێنە فرۆتن و كریارێن هۆڤانە دگەل وان نەئێنە كرن و كوشتن و مال وێرانكرن ل هەمبەر مللەتێ‌ مە ئێدی نەئێنە ئەنجام دان، هیڤیخوازم ئەڤ رۆژا چارەنڤیسساز كو ب درێژاهیا دیرۆكێ‌ كو هەتا نهۆ ل بەندێ‌ نە و دخوازم خەمساری تێدا نەئێتە كرن ب جۆش و خرۆشەكا بهێز ڤە بەرفرەه وێ‌ رۆژا نەتەوەی ڤە بچن بتنێ‌ ب دەنگێ‌ بەلێ‌ سەربەخۆبوونا كوردستانێ‌ مسۆگەر بكن.

 

یه‌كێتیی ئافره‌تای كوردستان

Email:

به‌ڕێوبه‌ره‌ی ماڵپه‌ڕ

نه‌سرین حه‌سه‌ن